最近又遇到一些關於電訊商綑綁增值服務的問題，即是大部分人都會使用本港幾間電訊商的套餐服務，有4G、5G網絡之外，附送一大堆未必用得著的增值服務，常見的就是86 易、音樂播歌程式、雜誌程式、指定遊戲任玩、來電轉駁之類等等，仲要每月徵收港幣18元的「港鐵/隧道/流動通訊牌照 / 行政費」…然後這些成本費用轉嫁到消費者，我的理解是，要為一大堆強行附加的指定增值服務，付上昂貴的月費，值唔值得就見仁見智。

以下主要係我本人既需要不代表任何人，亦都唔係廣告。我想講既係，最有用的增值服務係旅行漫遊日費。曾幾何時，我都經常到鴨記購買世界各地的網絡卡，常備的旅行裝備之中有插SIM針卡，在飛航的時候換SIM卡，一到當地就解除飛航接上當地網絡，不用下機在當地電訊商那邊磨磨蹭蹭。之所以種種因素，決定捨棄傳統電訊商的[通話+網絡]套餐plan，將香港通話的電話號碼轉台至CSL旗下的ClubSim（同類公司仲有數碼通旗下的自由鳥），變成僅得通話用途的電話號碼，每月收費$28。

咁點上網？善用iPhone的雙卡糟，插上另一張一次性付費$499的365GB網絡卡，一年之內隨便用，唔需要電訊商個「月月滾存」服務，總之就係一年有365GB，以我黎講任用都係用唔哂，完全無限速的問題，就係咁一年總開支只不過係$835，若果流量需求更低，改買200GB又好、100GB又好，開支只會更平，慳出黎的開支根本就係自己的消費券。

另一個最大最大的好處係，去旅行唔洗再用插SIM針卡，唔洗再拆用完即棄的包裝及SIM卡咁唔環保。雙卡糟在香港各自發揮[通話]、[網絡]功能，離港之後，通話專用的電話號碼變成旅行漫遊卡，以香港人常去的地方包括日本、韓國、台灣、泰國等地，逐日計都係$15，仲可以買夠一星期折到平均每日$11左右，亦都唔洗再擔心鴨記上網卡到左當地，要做一大堆設定才能接上當地網絡，即刻有實時地圖睇，仲可以同時收到香港電話的驗證碼，無痛過程讓我旅行更暢順無阻。

以上就係我而家用得好快樂的生活與旅遊模式，雖然而家無得正常飛，但所有功能都係貫徹「用者自付」，即係當需要的就買，唔需要既送比我都無用，倒不如由我自己去決定所謂的增值服務，最重要係無合約隨時改，同埋如果移民離港，都可以當係養號碼的方法。