兌換金字塔

最近身邊好多朋友都開始儲亞洲萬里通 Asia Miles(下稱AM),零成本消費chok分、訂檯食飯都有得儲,而各大信用卡都會以送AM里數為迎新獎賞,碌夠指定金額再送額外獎賞,新客戶愈碌得多又獎上加獎、里上加里!對銀行黎講,點都好過以前大多都是送贈品,如行李箱、氣炸鍋、光波爐等生活用品或小型電器,客戶群有限制,皆因所謂贈品未必係靚貨,屋企地方細送比我都要諗諗,但送AM就禮品選擇多多,大多數人既目標瞄準兌換機票,送AM里數自然成為主流,開戶展開儲分人生變得更普及。

AM自宣布6月22號改制,兌換短程來回機票由3萬里變2萬里,仲可以1萬里兌換2,750哩以內既單程機票,兼享有Stopover或Layover(兩個航段),有新制就有新玩法,自然有人吹奏新制咩玩法,解釋如何以3萬里兌換來回機票,改為拆開兩張共2萬里兌換單程機票,盡用Stopover兩票玩兩地,以最少成本追求利益極大化,聽落真係好抵玩咁喎!(點玩法?網上有海量攻略不在此詳解啦~)而事實真相則是,兌換機票獎賞僧多粥少,以最少里數兌換機票變得更難換。

螢幕快照 2018-07-21 21.59.07

「嘥氣,呢個世界邊有咁完美!」

如意算盤打得響,就要提早353日搶Quota唔多既兌換機票,否則就要排候補機票,仲要候到出發前唔夠一個月先通知你有定無,計劃好哂行程屆時無既話,到時真係欲哭無淚,咁就可能要焗買貴左既海鮮價機票,或者貴里機票甚至升艙等,鬼叫你咁遲買咩,但好多上班族朋友都未必預計到353日後去旅行…幾個月後出發個d根本唔洗諗!

螢幕快照 2018-07-21 22.13.55

飛行獎勵類別:「標準賞」「靈活賞」「隨心賞」

咪住!其實仲有得換既,兌換機票機制如金字塔分三級制,由以前的「優越獎勵機票級別」改為-「標準賞」、「靈活賞」、「隨心賞」,用最少里數「標準賞」兌換當然係最理想啦,雖然今次改制兌換所需里數少左而多左人兌換,因此可換機位增加20%,但講就咁講,Quota一樣都係僧多粥少,搶飛仍然係指定動作,上面提到要353日前搶飛都只是最低成本的「標準賞」,如果想確保旺季日子出行,就要360日前以1.5x里數兌換「靈活賞」(比標準賞早一星期搶),若然真係預計唔到落實日子,咁就用2x倍里數「隨心賞」,但唔會好多人願意用更多里數去兌換。

螢幕快照 2018-07-26 23.10.05

「貴里機票咁蝕底,點換得落呀?!」

怕蝕底的香港人,真係會彈起來瞪大眼架!例如來回東京:新制下「標準賞」所需里數2萬里,而「隨心賞」就倍增到4萬里,即係貴里機票!貴里機票當然乏人問津,若然真係打算換都唔急於360日前就搶,極端啲出發前幾日都換得到,所以最重要個句就係,「標準賞」唔係你想換就換到,玩到咁盡有壓力又何必呢,金字塔頂端唔係個個都去到㗎!既然係咁,倒不如一開始就昅實各大航空公司或旅行社,買優惠折扣價仲好啦!

咁仲儲唔儲AM?積分有得轉就轉去Avios,經常飛日本就轉去ANA,起碼無咁多人同你爭。至於AM大概用黎主攻旺季機位或長途商務艙,咩咩三萬里玩兩地,除非閣下是長期待業或自由職人士,可以提早353日落實旅行日子兼做好時間分配,否則真係摺埋心水,以後用「隨心賞」隨時隨地換,而我就為左登富士山,前幾日先兌換東京來回既旺季機票,正價六千幾點買,唔換幾時換喎,富士山登頂唔等我架嘛!里數要花得其所方為上策,最緊要開開心心去旅行,分可以再儲過。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s